ಹೀಗೊಂದು ಸಂಭಾಷಣೆ

ಹೀಗೊಂದು ಸಂಭಾಷಣೆ: 

ಅಶೋಕ:  ಏನು ತಿಳಿಯದಿರ್ದಡೆಯೂ ಅಹುದಹುದೆನ್ನುವವರ ಕಂಡು ಮೆಚ್ಚ

ಏನು ತಿಳಿಯದಿರ್ದಡೆಯೂ ಅಹುದಹುದೆನ್ನುವವರ ಕಂಡು ಮೆಚ್ಚುವವರನೂ ಮೆಚ್ಚ ನಮ್ಮ ಕೂಡಲಸಂಗಮದೇವ

ಪ್ರಜ್ಞಾ:    ಏನು ತಿಳಿಯದಿರ್ದಡೆಯೂ ಅಹುದಹುದೆನ್ನುವವರ ಕಂಡು ಮೆಚ್ಚದವರ, 
ಏನು ತಿಳಿಯದಿರ್ದಡೆಯೂ  ಅಹುದಹುದೆನ್ನುವವರ ಕಂಡು ಮೆಚ್ಚದವರ ಕಿಚ್ಚು ಸೂರ ಸುಟ್ಟಿದ್ದು ಕಂಡು ಮರುಗಿದೆನೋ ಚೆನ್ನ ಮಲ್ಲಿಕಾರ್ಜುನ 

ಷಣ್ಮುಖ: ಕಿಚ್ಚು ಹಚ್ಚಿಯೂ ಸೂರು ಸುಡದಿರಲೆಂಬ ಒಡಲ ಕಳವಳವ ಮೆಚ್ಚನಾ ಸರ್ವಜ್ಞ

ಪ್ರಜ್ಞಾ:  ಋಷಿ ಮೂಲ, ನದಿ ಮೂಲ, ಸ್ತ್ರೀ ಮೂಲ, ಮತ್ತು ಕಿಚ್ಚಿನ  ಮೂಲ ಅರಿತೆನೆಂಬವರಿಹರೆ ಜಗದಿ

ಜಗ ಮೆಚ್ಚಿದೊಡೆ ಆನಂದ ಮನ ಮೆಚ್ಚಿದೊಡೆ ಪರಮಾನಂದ ಚೆನ್ನಮಲ್ಲಿಕಾರ್ಜುನ

ಮಾಯದೋಕುಳಿ

ತಿಳಿ ನೀರ ಕೊಳದೊಳಗೆ
ನಸು ಕೋಪದಿಂದ ಮಿಸುಕಿದ್ದ
ಚಂದಿರನ ಕಣ್ಣುಗಳಲ್ಲಿ ಕೆಂಡದೋಕುಳಿ

ತಿಳಿಗಡಲ ಅಲೆಯೊಳಗೆ 
ಮೆಲ್ಲುಸಿರ ಲಯದಂತೆ ಅವಿತಿದ್ದ 
ಕಾಲನ ನೊರೆಯಲ್ಲಿ ಮಾಯದೋಕುಳಿ


ಇಳಿಬಿಟ್ಟ ಸೆರಗು ಸರಿದದ್ದ ಲೆಕ್ಕಿಸದೆ
ಧಾವಿಸಿದ ಚಕೋರಿಯ 
ಕಾಲ್ದನಿಯ ಕಿಣಿ ಕಿಣಿಯಲ್ಲಿ ಲಜ್ಜೆಯೋಕುಳಿ

ಕಮಲದೆಲೆಯೊಳಗಿಂದ 
ಇಣು ಇಣಿಕಿ ನೋಡಿದ್ದ ಚಂದಿರನ 
ಬಿಂಬಾಧರಗಳ ಮೇಲೀಗ ನಗುವಿನೋಕುಳಿ

ಮತ್ತು...
ಕೊಳದ ತಿಳಿಯೊಳಗೀಗ ರಂಗಿನೋಕುಳಿ!